Камерны аркестр Беларускай дзяржаўнай акадэміі музыкі створаны ў 1969 г. У назве аркестра “Gradus ad Parnassum” (“Ступень да Парнаса”) падкрэсліваецца імкненне да ідэальнай якасці. Кожная новая праграма, кожны канцэрт у жыцці гэтага маладога творчага калектыву – своеасаблівая прыступка ўзыходжання да прафесійнага артыстычнага майстэрства, мастацкай дасканаласці. Пастаянна аднаўляючыся новымі музыкантамі з ліку студэнтаў, якія паступаюць у акадэмію для навучання, аркестр захоўвае высокі прафесійны выканальніцкі ўзровень.
Першым кіраўніком аркестра быў прафесар Вячаслаў Міхайлавіч Зяленін, у 1990-х гг. аркестрам кіраваў Валерый Майсеевіч Сарока, а з 1999 г. яго ўзначаліў таленавіты прадстаўнік беларускай дырыжорскай школы, загадчык кафедры аркестравага дырыжыравання, дацэнт Пётр Віктаравіч Вандзілоўскі. У пачатку сваёй кар’еры ён з вялікім поспехам выступіў як дырыжор оперы “Царская нявеста” М.Рымскага-Корсакава ў творчым аб’яднанні “Нацыянальны акадэмічны Вялікі тэатр оперы і балета РБ”. З 1992 г. П.Вандзілоўскі працаваў дырыжорам Дзяржаўнага акадэмічнага сімфанічнага аркестра РБ і вёў актыўную канцэртную дзейнасць: выступаў з сімфанічным аркестрам Белтэлерадыёкампаніі, Мінскім дзяржаўным аркестрам духавых інструментаў “Няміга”, гастраляваў па Расіі, Украіне, Польшчы, Германіі, Бельгіі. Галандыі, Іспаніі, Італіі, Турцыі, Харватыі, Сербіі, Сірыі, Фінляндыі. У 1997-1998 гг. П.В.Вандзілоўскі быў запрошаны на пасаду галоўнага дырыжора ў філарманічны сімфанічны аркестр г. Сараева (Боснія і Герцагавіна), з 2003 па 2009 гг. ён з’яўляўся галоўным дырыжорам і мастацкім кіраўніком Дзяржаўнага камернага аркестра РБ.
Камерны аркестр акадэміі з’яўляецца навучальным калектывам, але вядзе пастаянную канцэртную дзейнасць, выступаючы ў розных рэгіёнах Беларусі і за мяжой, удзельнічаючы ў многіх музычных фестывалях. Гэты калектыў запрашаюць для выступлення падчас святочных і ўрадавых мерапрыемстваў, на яго базе праводзіліся дырыжорскія майстар-класы ў Італіі. Калектыў з поспехам выступаў у найбуйнейшых залах Германіі, Іспаніі, Фінляндыі, Галандыі, Бельгіі.
Шырокі канцэртны рэпертуар калектыву ўключае ў сябе творы розных эпох, школ і напрамкаў – ад барока да авангарда. У рэпертуары аркестра такія складаныя сачыненні, як «Серэнада для струннага аркестра» П.Чайкоўскага, «Серэнада» А.Дворжака, “Сімфонія № 2” А.Онегера, “Шэсць Брандэнбургскіх канцэртаў” І.С.Баха, сюіта “Музыка на вадзе Месія” Г.Ф.Гендэля, “Вялікая імша” В.А.Моцарта і інш. Выкананню аркестра ўласціва імкненне да стылявой дакладнасці, дынамічнай выразнасці, тэхнічнай дасканаласці. Аркестр мае свае фондавыя запісы ў Белтэлерадыёкампаніі, кампакт-дыскі з творамі І.С.Баха, Ф.Хафмайстара, В.А.Моцарта, С.Рахманінава і інш.
З 2020 па 2022 г. аркестр узначальваў малады дырыжор В.Ларын. Сёння кіраўніком аркестра з’яўляецца М.П.Церан.
