Беларуская канцэртмайстарская школа вядзе свой пачатак з сярэдзіны 50-х гадоў ХХ стагоддзя, калі канцэртмайстарскі клас пачала выкладаць Эдзі Маісееўна Тырманд (1917–2008). Выбітны педагог і кампазітар, чалавек вялікай эрудыцыі, таленавіты музыка, яна стварыла сістэму выхавання канцэртмайстра, заснаваную на ўменні правільнага чытання аўтарскага тэксту, пранікненні ў мастацкую задумку твора, дакладным веданні выканальніцкіх мэт і задач. Цікава, што за гады выкладання (з 1954 па 1990) і наступныя, маючы каласальны педагагічны вопыт, яна не напісала ніводнай метадычнай работы, з якой можна было б атрымаць і тэарэтызаваць сутнасць яе выкладчыцкай дзейнасці. Спадчынай Э.М. Тырманд з’яўляецца адзіная вучэбна-метадычная распрацоўка “Праца канцэртмайстра ў канцэртмайстарскім класе” (1976). І зараз яе ўдзячныя вучні, успамінаючы незабыўныя ўрокі, якія праходзілі творча, грунтоўна, мэтанакіравана на атрыманне патрэбнага выніку, у сваіх метадычных работах змаглі раскрыць і асэнсаваць асноўныя прынцыпы выкладчыцкай дзейнасці Э.М. Тырманд.
Выкладчыкі кафедры пастаянна развіваюць методыку сваёй работы: выдаюцца праграмы, метадычныя дапаможнікі, вучэбна-метадычныя комплексы. Значнай падзеяй у навучальным працэсе з’явілася замацаваная за кафедрай у навучальным плане 2013 года дысцыпліна “Чытанне нот з ліста і транспанаванне”. Праграма па гэтай дысцыпліне, распрацаваная Т.У. Беляковай, дазваляе студэнтам рабіць поспехі ў авалоданні навыкамі гэтага важнага складніка практычнай канцэртмайстарскай працы.
Эфектыўнасць навучальнага працэсу падтрымліваецца актыўнай і разнастайнай канцэртнай працай на кафедры. Такая дзейнасць дазволіла стварыць асобны цыкл канцэртаў “Канцэртмайстарскае майстэрства”. У праграме цыкла прадстаўлены канцэрты студэнтаў кафедры, маладых выкладчыкаў, класаў выкладчыкаў, а таксама да юбілейных дат кампазітараў.
Найлепшыя традыцыі кафедры з поспехам працягваюць яе выпускнікі. Большасць з іх працуюць канцэртмайстрамі ў тэатрах, канцэртных і музычных навучальных установах, нярэдка сумяшчаючы практычную дзейнасць з выкладчыцкай. Кожнае пакаленне выпускнікоў кафедры прадстаўлена вялікай колькасцю дыпламантаў міжнародных і рэспубліканскіх конкурсаў, якія прадэманстравалі высокае канцэртмайстарскае мастацтва ў выступленнях з вакалістамі і інструменталістамі, творчымі калектывамі. З цягам часу пачала пашырацца геаграфія практычнай дзейнасці выхаванцаў кафедры канцэртмайстарскага майстэрства. На гэты момант яна ахоплівае краіны Еўропы, Паўночнай Амерыкі, Блізкага Усходу, Паўднёва-Усходняй Азіі, дзе выпускнікі кафедры працуюць вядучымі канцэртмайстрамі тэатраў, канцэртных і навучальных устаноў.
Сёння педагагічны калектыў кафедры канцэртмайстарскага майстэрства, захоўваючы традыцыі беларускай канцэртмайстарскай школы, накіроўвае сваю дзейнасць на павышэнне якасці вучэбна-выхаваўчага працэсу, на стварэнне неабходных творчых і арганізацыйных умоў для выхавання паўнацэнных канцэртмайстраў-прафесіяналаў.
