Бібліятэка Беларускай дзяржаўнай акадэміі музыкі прадстаўляе тэматычную выставу “Сяргей Картэс – кампазітар, народны артыст Беларусі”, падрыхтаваную да 90–гадовага юбілею Сяргея Альбертавіча Картэса (18.02.1935 – 26.06.2016).
Народны артыст Беларусі Сяргей Картэс ̶ яркая і шматпланавая асоба ў беларускай музычнай гісторыі, адзін з лідэраў айчыннай кампазітарскай школы ХХ – пачатку ХХІ стагоддзяў.
Першыя 20 гадоў жыцця правёў у Аргенціне. У 1955 годзе разам з бацькамі прыехаў у Савецкі Cаюз. У 1962 годзе скончыў аддзяленне кампазіцыі Беларускай кансерваторыі па класе Н. І. Аладава і А. В. Багатырова. Кар’ера музыканта і кампазітара развівалася імкліва. У 1961 годзе Сяргей Альбертавіч ужо загадваў музычнай часткай ТЮГа, з 1965 года – загадчык музычнай часткі Дзяржаўнага рускага драматычнага тэатра імя М. Горкага, з 1966 года – Беларускага дзяржаўнага тэатра імя Я. Купалы. З 1972 года – музычны рэдактар, а з 1981 па 1992 год – галоўны музычны рэдактар кінастудыі “Беларусьфільм”. З 1991 года быў дырэктарам – мастацкім кіраўніком Нацыянальнага акадэмічнага тэатра оперы і балета Рэспублікі Беларусь.
Музычная спадчына С. Картэса багатая ў дачыненні да выбару тэм, ідэй і жанраў: аркестровыя, харавыя і вакальныя сачыненні, камерна-вакальныя і камерна-інструментальныя сачыненні: араторыі «Песня пра Кубу», «Памяці паэта», сімфанічная паэма «Попел», оперы “Джардана Бруна”, “Матухна Кураж”, “Візіт дамы”, “Юбілей”, “Мядзведзь”, балет “Апошні інка”.
Сярод работ у жанрах прыкладной музыкі вылучаецца зварот С. Картэса да творчасці беларускіх паэтаў, празаікаў і драматургаў: У. Караткевіча, І. Шамякіна, А. Макаёнка, К. Крапівы, А. Дударава і інш.
Сусветныя прэм’еры сачыненняў Сяргея Картэса адбыліся ў розных краінах свету, у тым ліку Расіі, Швейцарыі, Малдове, Літве, Венесуэле, Кубе, Аргенціне, Францыі і інш.
На выставе прадстаўлены энцыклапедычныя, навуковыя і перыядычныя выданні, артыкулы пра жыццё і творчасць майстра, ноты, фотадакументы і выяўленчыя матэрыялы.
Экспазіцыя выставы размяшчаецца ў Ліфтавым холе (6 паверх) навучальнага корпуса № 3 (вул. П. Броўкі, 22) з 29 студзеня па 20 красавіка 2025 г.
