2 красавіка 1996 года прэзідэнты дзвюх краін Барыс Ельцын і Аляксандар Лукашэнка падпісалі ў Маскве дагавор “Аб утварэнні супольнасці Беларусі і Расіі”. Праз год быў заключаны дагавор “Аб Саюзе Расіі і Беларусі”. З таго часу 2 красавіка адзначаецца як Дзень яднання народаў Беларусі і Расіі. Гэты дзень стаў сімвалам паспяховага супрацоўніцтва ва ўсіх сферах жыцця нашага грамадства, уключаючы эканоміку, адукацыю, культуру і навуку. Свята нагадвае аб значнасці сумесных намаганняў і падтрымкі паміж дзвюмя дзяржавамі, сімвалізуе братэрства і цесныя сувязі паміж краінамі, народы якіх маюць агульныя карані і тысячагадовую гісторыю.

Сумесная дзейнасць у галіне культуры – гэта правядзенне палітыкі Саюзнай дзяржавы, скіраванай на захаванне агульных гістарычных каштоўнасцей, развіццё творчай актыўнасці і культурнага супрацоўніцтва народаў Беларусі і Расіі. У рамках Саюзнай дзяржавы сталі традыцыйнымі сумесныя фестывалі, сустрэчы дзеячаў мастацтва, культурныя абмены і гастролі творчых калектываў, сумесная вытворчасць кінафільмаў, правядзенне выстаў, ахова гістарычных і культурных помнікаў, іх рэстараўрацыя.

На выставе прадстаўлены навуковыя і грамадска-палітычныя перыядычныя выданні, артыкулы з вядучых друкаваных сродкаў масавай інфармацыі. Экспазіцыю дапаўняюць копіі аўтарскіх рукапісаў вакальных твораў, прысвечаных дружбе двух брацкіх народаў, беларускага кампазітара І. М.  Лучанка: песня «Беларусь, Россия – вместе» на словы І. У. Цітаўца і балада для саліста, мужчынскага ансамбля і фартэпіяна «Белорусско-русская земля» на словы А. і. Лук’янава.

Экспазіцыя выставы размяшчаецца ў каб. 210 вучэбнага корпуса № 3 (вул.  П. Броўкі, 22) з 27 сакавіка па 05 красавіка 2025 года.