Бібліятэка Беларускай дзяржаўнай акадэміі музыкі прадстаўляе тэматычную выставу «Карнавал навагодніх мелодый».
З надыходам зімы мы адчуваем асаблівы настрой, чакаючы святы – Новы год і Каляды. Гэта час сямейных традыцый, сустрэч з сябрамі, яркіх святочных вечароў. Адным з найважнейшых кампанентаў гэтага часу з’яўляецца музыка, яна стварае адмысловую атмасферу, напаўняючы нас радасцю і энергіяй, натхняючы на новыя здзяйсненні і перамогі. Навагоднія творы выключна пазітыўныя і выклікаюць толькі станоўчыя эмоцыі. Кампазітары розных краін і эпох звярталіся да тэмы Нараджэння Хрыстова і Каляд, ствараючы дзівосныя па прыгажосці тварэнні: «Рождественская оратория» І. Баха, сцэна «Пророчество о рождении Христа» з араторыі «Мессия» Г. Гендэля, «Рождественское кончерто гроссо» А. Карэллі, творы П. Чайкоўскага «Щелкунчик», «Черевички», «Святки (декабрь)» з цыклу «Времена года», опера М. Рымскага-Корсакава «Ночь перед Рождеством», опера «Ёлка» В. Рэбікава, «Дед Мороз» з цыклу «Альбом для юношества» Р. Шумана, «Снежная королева» С. Пракоф’ева, «Рождественская ёлка» Ф. Ліста і многія іншыя.
Музыка Новага года і Каляд – гэта не толькі класічныя творы, але і ўнікальныя сучасныя кампазіцыі, створаныя спецыяльна для свята. Свежыя музычныя ідэі і сучасныя аранжыроўкі надаюць зімовым святам асаблівую ноту і робяць іх яшчэ больш выдатнымі і яркімі.
Сярод беларускіх кампазітараў да навагодняй тэматыкі звярталіся А. Атрашкевіч, В. Войцік, Г. Гарэлава, А. Безенсон, С. Бугасаў, А. Літвіноўскі, М. Чуркін, Л. Шлег, Э. Зарыцкі, Я. Паплаўскі, Э. Ханок і інш.
На выставе прадстаўлены нотныя выданні і гуказапісы святочных твораў рускіх, беларускіх і замежных кампазітараў.
Экспазіцыя выставы размяшчаецца ў навучальным корпусе №1 (вул. Інтэрнацыянальная, 30)
у 140 каб. з 12 снежня 2023 года па 15 студзеня 2024 года.
Калектыў бібліятэкі віншуе прафесарска-выкладчыцкі склад, аспірантаў, магістрантаў, студэнтаў і супрацоўнікаў Беларускай дзяржаўнай акадэміі музыкі з надыходзячым Новым годам і Калядамі. Няхай кожны ваш дзень будзе напоўнены новымі пачынаннямі, а кожная хвіліна будзе каштоўнай і запамінальнай. Давайце вітаць новы 2024 год з надзеяй і аптымізмам, ведаючы, што перад намі адкрываецца цэлы год магчымасцяў і дасягненняў!
